У сераду, 1 лютага, расіян, якія ваююць ва Украіне, наведаў кіраўнік Паўночнай Асеціі Сяргей Мяняйла. Ён пабываў у адным з падраздзяленняў 19-й мотастралковай дывізіі, якая базуецца ва Уладзікаўказе, і перадаў байцам тэхнічную дапамогу, у тым ліку цеплавізары і прыборы начнога бачання, паведамляе ТАСС. Частка тэхнікі аказалася вытворчасці кампаніі з ЕС з беларускімі каранямі, хоць пастаўкі такой прадукцыі ў Расію забароненыя санкцыямі, а сама кампанія выступае супраць вайны.
Усяго кіраўнік Паўночнай Асеціі прывёз вайскоўцам 50 цеплавізараў і 20 прыбораў начнога бачання, а таксама аўтамабільную і аргтэхніку. І паабяцаў дапамагаць і далей — як гэтаму падраздзяленню, так і іншым. Ва Украіне цяпер ваююць два добраахвотніцкія асяцінскія батальёны, у дадатак сфармаваны цэлы батальён мабілізаваных.
«Люстэрка» звярнула ўвагу на відэа, якое апублікавала ТАСС. На ім відаць, што ў перададзенай партыі тэхнікі ёсць зброевыя прыцэлы брэнда Pulsar.
Імаверна, гэта мадэль Pulsar Digisight Ultra N455 LRF. Гэта суперсучасны начны лічбавы прыцэл, які дазваляе страляць на дыстанцыі да 500 метраў ад цэлі, абсталяваны лазерным далямерам, які вымярае адлегласць да 1000 м і мае мноства іншых опцый, здольных даць перавагу ў баі.
Вырабляе гэтыя прыцэлы кампанія Yukon Advanced Optics Worldwide, яна ж Yukon Pulsar. Яе апісваюць як сусветнага лідара ў вытворчасці лічбавай аптычнай тэхнікі і цеплавізійных прыладаў. Прадукцыя прадаецца больш чым у 70 краінах і даступная цывільным асобам — кампанія пазіцыянуе сваю тэхніку ў першую чаргу як прадукцыю для паляўнічых, рыбаловаў і гэтак далей.
Yukon Advanced Optics Worldwide зарэгістраваная у Літве, ёю кіруе Аляксандр Альшэўскі (Aliaksandr Alsheuski — мяркуючы з напісання імені, беларус). Як гаворыцца на сайце кампаніі, яна была заснаваная ў 1998 годзе грамадзянамі Беларусі і ЗША. Можна знайсці і больш дэталяў: фірму стварылі на базе вытворчага прадпрыемства ў Беларусі, якое з 1991 года выпускала падзорныя трубы, і гандлёвай аптычнай кампаніі, размешчанай у Тэхасе.
З 2005 года фірма вядзе дзейнасць з Вільні, дзе знаходзіцца яе галаўны офіс. Адтуль жа яна кіруе сям’ю даччынымі кампаніямі ў Вялікабрытаніі, Латвіі, Украіне, Кітаі. А таксама ў Расіі і Беларусі. У Беларусі ў Yukon Advanced Optics Worldwide захаваўся буйны завод «Белтэкс Оптык» у Лідзе, а ў Расіі — вытворчае прадпрыемства «Мезон-А» ў Смаленску.
Зрэшты, дзейнасць прадпрыемства ў Расіі спыненая, а беларускага завода — моцна абмежаваная. Pulsar займае антываенную пазіцыю. У пачатку сакавіка 2022 года на яе сайце была апублікаваная заява: Pulsar асудзіла расійскае ўварванне ва Украіну і выказала адназначную падтрымку ўкраінскаму народу.
«Адгрузка гатовай прадукцыі ў РФ і далейшая вытворчая дзейнасць прадпрыемства ў Расіі ў сітуацыі, якая склалася, можа прывесці да трапляння прадукцыі кампаніі ў зону баявых дзеянняў і неапраўданых чалавечых ахвяраў. Каб пазбегнуць гэтага, было прынятае рашэнне пра закрыццё прадпрыемства ў РФ. Дзейнасць прадпрыемства ў Беларусі абмежаваная», — гаворыцца ў заяве.
Як тлумачыць кампанія, беларускі завод яшчэ вырабляе кампаненты, але яны пастаўляюцца выключна ў Літву, Латвію і Вялікабрытанію, дзе цяпер знаходзяцца асноўныя магутнасці Pulsar. Доля кампанентаў з Беларусі складае менш за 5% у выніковым кошце прадукцыі, сцвярджае кампанія. Паралельна яна пашырае аб’ёмы вытворчасці ў краінах ЕС і зніжае — у Беларусі.
У Pulsar таксама падкрэслілі, што не пастаўляюць прадукцыю ў краіны, куды пастаўкі забароненыя санкцыямі, таму ў сувязі з вайной усе пастаўкі ў Расію і Беларусь спыненыя.
Зрэшты, як паказаў пошук, суперсучасныя начныя прыцэлы Pulsar у Расіі да гэтага часу можна купіць у многіх профільных інтэрнэт-крамах. Ёсць і сайты, якія пазіцыянуюць сябе фірмовымі пастаўшчыкамі прадукцыі еўрапейскай кампаніі. Кошт прыцэла Pulsar Digisight Ultra N455 LRF, напрыклад, складае каля 155 тысяч расійскіх рублёў (каля 2,2 тыс. даляраў). Прычым вытворцам прыцэлаў інтэрнэт-крамы пазначаюць Беларусь.
Якім чынам падсанкцыйная тэхніка трапіла ў Расію, незразумела. Канкрэтна тая мадэль прыцэла, якую, падобна (бо менавіта яна ёсць у продажы на расійскіх сайтах), перадалі асяцінскім вайскоўцам, была выпушчаная на рынак яшчэ да 2022 года, таму расійскія крамы могуць прадаваць яшчэ старыя запасы. Альбо хтосьці паставіў гэтую прадукцыю ў РФ у абыход санкцый.