«Беларусбанк» расказаў падрабязнасці пра тое, як працуе новаўвядзенне па абмене валют, якое з 1 ліпеня ўвялі 17 банкаў. Нагадаем, гэтыя фінустановы дамовіліся прытрымлівацца адзіных правілаў замены банкнот у замежнай валюце. Для гэтага ўвялі адзіны пералік прыкмет плацежнасці грашовых знакаў.
«І калі раней у банкаў былі ўласныя падыходы да прыкмет плацежаздольнасці, то сёння ўсё адзінае», — удакладняе «Беларусбанк».
З цікавага — тое, што банкноты ў замежнай валюце, сапраўднасць якіх выклікае сумнеў або якія маюць відавочныя прыкметы падробкі, кліенту банка не вернуць. Яна забіраецца.
У «Беларусбанку» тлумачаць, што купюру не прымуць для абмену, калі на ёй ёсць малюнкі, абразлівыя і нецэнзурныя надпісы, а таксама канкрэтныя словы — хабар, выкуп, рэкет, злодзей.
Таксама банкі не прымуць грашовых знакаў з вытворчым бракам. Гэта сярод іншага адсутнасць або непрадрукоўка ахоўных элементаў, змазанасць выявы, неналежнае размяшчэнне вадзянога знака, адсутнасць асобных элементаў абароны ад падробкі (вадзянога знака, галаграмы, ахоўнай ніткі ці стужак), памылка ў напісанні.
Не атрымаецца замяніць таксама разарваныя або разрэзаныя на часткі банкноты, у тым ліку злепленыя празрыстым скотчам.
Пра тое, якія банкноты прымуць для абмену, «Люстэрка» пісала ў гэтым тэксце. Сярод іх — тыя, на якіх ёсць да пяці надрываў/надрэзаў даўжынёй не больш за 3 мм або адзін, але даўжынёй да 5 мм (у тым ліку падклееныя скотчам). Таксама можна будзе абмяняць грашовы знак, на якім ёсць праколы ці дзіркі (не больш за тры) дыяметрам да 1 мм.
Чытайце таксама
