Краіны Еўрасаюза — суседзі Беларусі, і адносіны з імі страчваць нельга. Пра гэта Аляксандр Лукашэнка заявіў падчас наведвання Нацыянальнага аэрапорта Мінск, перадае яго прэс-служба.
«Цяпер мы жывём перш за ўсё за кошт Усходу — супрацоўнічаем з Расіяй, Кітаем. Але не трэба забываць пра высокатэхналагічны Захад. Яны побач, яны нашыя суседзі — Еўрасаюз. І адносіны з імі страчваць нельга. Мы да гэтага гатовыя, але з улікам нашых уласных інтарэсаў. Паверце, прыйдзе час (цяпер такая турбулентнасць, кажучы на вашай мове, складанасці вялікія) — у 2024−2025 годзе, я ўпэўнены, адбудуцца сур’ёзныя змены ў свеце ў тым ліку», — выказаў меркаванне ён.
Ён нагадаў, што яшчэ ў ліпені даручыў ураду і МЗС «прапанаваць заходнім суседзям план добрасуседства і міру».
«І з палякамі трэба размаўляць. Я даручыў прэм’ер-міністру звязацца з імі. Калі яны хочуць, давайце размаўляць, наладжваць адносіны. Мы суседзі, а суседзяў не выбіраюць, яны ад бога. Але ў іх 15 кастрычніка парламенцкія выбары, і, вядома, ім трэба цяпер нагнятаць, нагнятаць абстаноўку для таго, каб паказаць, што яны правільна ўзбройвалі і пераўзбройвалі краіну. Таму да 15 кастрычніка яны наўрад ці пойдуць на нейкія істотныя змены, выгадныя ім і нам. Яны шмат чаго патрабуюць ад нас і просяць, але мы на гэта пайсці не можам, бо гэта супярэчыць нашым інтарэсам», — заявіў Лукашэнка.
На яго думку, «Польшча не сама па сабе нагнятае абстаноўку ў рэгіёне — яе падштурхоўваюць да гэтага Злучаныя Штаты»: «Амерыканцы зрабілі стаўку на Польшчу. Але палякі — людзі не дурныя. Гэта нашыя людзі, славяне. Яны ўсё выдатна разумеюць. Пацярпім, паглядзім. Мы адкрытыя для супрацоўніцтва».
Аляксандр Лукашэнка забыў згадаць, што Польшча толькі адказвае на эскалацыю з боку Беларусі, але не з’яўляецца яе ініцыятарам. Закрыццё практычна ўсіх пунктаў пропуску (акрамя пераходаў «Тэрэспаль — Брэст» (для легкавых аўтамабіляў) і «Казловічы — Кукурыкі» (для грузавога транспарту) стала рэакцыяй на прысуд журналісту Андрэю Пачобуту.
Размяшчэнне 10 тысяч польскіх вайскоўцаў у раёне мяжы з Беларуссю — рэакцыя на з’яўленне ў Беларусі наймітаў ПВК Вагнера і новы віток міграцыйнага крызісу.
Чытайце таксама
