У пятніцу Аляксандр Лукашэнка заявіў, што гатовы наладжваць польска-беларускія адносіны. Але адных толькі словаў недастаткова, заявіў прадстаўнік Міністэрства замежных справаў Польшчы ў каментары RMF FM.
«І з палякамі трэба размаўляць. Я даручыў прэм’ер-міністру звязацца з імі. Калі яны хочуць, давайце размаўляць, наладжваць адносіны. Мы суседзі, а суседзяў не выбіраюць, яны ад бога», — сказаў Лукашэнка 11 жніўня падчас візіту ў Нацыянальны аэрапорт Мінск. Адносіны з Еўрасаюзам «страчваць нельга», падкрэсліў ён.
Аднак выказванне палітыка не зрабіла вялікага ўражання на польскі бок.
— Адной толькі змены наратыву абсалютна не дастаткова, — адказаў Лукашэнку намеснік кіраўніка МЗС Польшчы Павел Яблонскі. — Калі Беларусь хоча мець добрыя адносіны з Польшчай, шлях да гэтага вельмі просты. Спыненне атак на нашую мяжу, вызваленне Анджэя Пачобута і іншых палітвязняў.
Гэтыя рашэнні залежаць выключна ад беларускіх уладаў, адзначыў польскі дыпламат.
— У нас няма варожых намераў у дачыненні да Беларусі і ніколі не было, — падкрэсліў Яблонскі. — Мы не збіраемся падтрымліваць кепскія адносіны з Беларуссю. Наадварот, хацелася б, каб яны былі як мага лепшымі. Але беларускія ўлады паводзяць сябе так, як паводзяць, і гэта яны нясуць поўную адказнасць за тое, што ў нас кепскія адносіны. Беларусь — папросту варожа настроеная да Польшчы дзяржава.
Нагадаем, цяпер на беларуска-польскай мяжы працуе толькі адзін пасажырскі і адзін грузавы пункт пропуску (апошні не прапускае беларускі транспарт). Першым быў закрыты пункт пропуску «Брузгі» яшчэ ўвосень 2021 года з прычыны масавай атакі нелегальных мігрантаў з беларускага боку. Праз наплыў мігрантаў, перамяшчэнню якіх садзейнічаюць беларускія памежнікі, Польшча была вымушаная ўзмацніць вайсковы кантынгент у памежных рэгіёнах.
Вясной 2023 года былі закрытыя іншыя пункты пропуску, акрамя «Тэрэспаля», у якасці адказу на вынясенне ўладамі Беларусі жорсткага прысуду дзеячу польскай меншасці, журналісту Анджэю Пачобуту. У апошнія тыдні Польшча размяшчае дадатковыя войскі і тэхніку ля мяжы праз знаходжанне ў Беларусі ПВК Вагнера і пагражае закрыць мяжу ў выпадку якіх-кольвек правакацый. Адна адбылася на мінулым тыдні — беларускія верталёты парушылі паветраную прастору Польшчы, заляцеўшы ўглыб польскай тэрыторыі на 3 км.