З 1 верасня ў Беларусі паднялі працоўныя пенсіі. Пасля гэтага павышэння сярэдняя пенсія па ўзросце пенсіянера, які не працуе, мусіць складаць каля 737 рублёў. Пры гэтым у некаторых беларусаў пенсіі перавышаюць 1250 рублёў. Палічылі, якой павінная быць зарплата, каб атрымліваць выплаты такога ўзроўню.
Максімальная пенсія па ўзросце для пенсіянера, які працуе, на 1 верасня была на ўзроўні 829,48 рубля. Пра гэта паведамляе камітэт па працы, занятасці і сацыяльнай абароне Віцебскага аблвыканкама. Такія сумы атрымліваюць жанчыны са стажам працы 40 гадоў і мужчыны — з 45 гадамі. Сярэдні памер пенсій — 683,05 рубля.
Для пенсіянера, які не працуе, пры індывідуальным каэфіцыенце (ІК) на ўзроўні 4 максімальная пенсія складае 1 142,71 рубля, а пры ІК на ўзроўні 5 — 1 258,73 рубля. Гэта пенсіянеры, у якіх заробкі былі на ўзроўні чатырох і пяці сярэдніх па краіне. Так, падчас разліку пенсіі выводзіцца спецыяльны каэфіцыент: бярэцца фактычны заробак чалавека і параўноўваецца з сярэднім заробкам па краіне за той жа месяц. Калі каэфіцыент атрымаўся 1 — значыць, вашая зарплата была роўная сярэдняй. Калі 1,5 — у паўтара разу большая, калі 0,5 — у паўтара меншая. То-бок чым вышэйшы заробак, тым большы каэфіцыент і вышэйшая пенсія.
Да прыкладу, у ліпені гэтага года сярэдні заробак складаў 1 933,1 рубля. Для пенсіі ў 1258,73 рубля зарплата мусіла складаць каля 9,7 тыс. рублёў. Гэта прыкладныя разлікі, падчас вызначэння пенсіі ўлічваюцца таксама іншыя фактары.
Мінімальная працоўная пенсіі па ўзросце — 394,4 рубля. Гэта сума з улікам спецыяльнай даплаты. Выплаты па ўзросце інвалідам Вялікай Айчыннай вайны ў сярэднім складаюць 833,59 рубля. У шматдзетных маці сярэдняя пенсія — 620,67 рубля.