У «БТА Банка» ў Беларусі змяніўся ўласнік. Ім стала кампанія з Казахстана SNRG Capital Eurasia, якая належыць прадпрымальніку з гэтай краіны Султану Марэнаву. Пра гэта паведамляецца на сайце фінустановы. Нагадаем, у лютым гэтага года з’явілася інфармацыя, што Нацбанк Беларусі даў дазвол на такую ўгоду.
Казахская фірма SNRG Capital Eurasia ўваходзіць у групу яго кампаній SNRG Capital Pte Ltd (Сінгапур), якая працуе ў галіне лічбавага банкінгу, фінансавых і інфармацыйных тэхналогій, бізнес-кансалтынгу і кіравання праектамі.
SNRG Capital Eurasia выкупіла 99,93% акцый «Банка БТА» ў яе «мамы» — казахстанскага «БТА Банка».
Султан Марэнаў з 2005 да 2015 года займаў пасаду старшыні праўлення беларускага «БТА Банка». Са студзеня 2024 года ён узначальвае раду дырэктараў «БТА Банка». Ён расказаў пра планы што да развіцця фінустановы:
— Мы плануем узмацніць кіраўнічую каманду і сфакусавацца на патрэбах нашых кліентаў, а таксама прапанаваць выгадныя ўмовы для фізічных асоб, малога і сярэдняга бізнесу і для тых, хто вядзе актыўную знешнеэканамічную дзейнасць. Разумеючы, што сёння запатрабаваныя бясшвовыя лічбавыя сэрвісы, мы прыкладзём усе намаганні для таго, каб іх палепшыць.
Пры гэтым у банка, як паведамляецца, будзе новая назва.
«Банк будзе актыўна развіваць цяперашнія напрамкі, а таксама ў межах новай стратэгіі падтрымае актуальнымі фінансавымі рашэннямі прадпрыемствы і прадпрымальнікаў, арыентаваных на рынкі Паўднёвай і Паўднёва-Усходняй Азіі. Для рэалізацыі гэтых задач „БТА Банк“ ужо сёлета зменіць сваю назву, якая будзе цалкам адпавядаць новай стратэгіі», — паведамілі ў фінустанове.
У асноўным кліенты «БТА Банка» — малы і сярэдні бізнес, а таксама фізічныя асобы.
Чытайце таксама
