У Мінску на аўкцыён выставілі будынак былога дзіцячага садка, які закрылі ў 1998 годзе. Цяперашнім уласнікам будынка пазначаная кампанія «Гринарра». Раней у 2022 годзе тут размяшчалася прыватная сярэдняя школа EduHill. Пачатковы кошт аб’екта — 3 млн 924 тысячы рублёў.
Адрас будынка — Мірашнічэнкі, 41. Даўжніком аб’екта пазначаная кампанія «Гринарра». Прычына, з якой нерухомасць выставілі на аўкцыён, — арышт, забарона ажыццяўляць рэгістрацыйныя дзеянні судовага выканаўцы, іпатэка.
На фірму «Гринарра» падалі некалькі судовых пазоваў. Адзін з іх — ад прыватнай сярэдняй школы EduHill, якая працавала ў будынку на Мірашнічэнкі, 41 у 2022 годзе: пра пераезд навучальнай установы ў гэты будынак паведамлялася ў чэрвені. Аднак ужо ў верасні таго ж года школа перастала актыўнічаць у сацсетках, цяпер яна не працуе.
Нагадаем, восенню 2022 года ў Беларусі былі закрытыя прыватныя школы. Бацькі былі вымушаныя аператыўна пераводзіць дзяцей у дзяржаўныя навучальныя ўстановы. «Выжылі» пасля гэтага нешматлікія прыватныя школы.
Раней у 2023 годзе гэты будынак на Мірашнічэнкі, 41 ужо выстаўлялі на таргі, але тады яны былі адмененыя на рашэнне судовага выканаўцы. Тады пачатковы кошт быў на ўзроўні 3 мільёнаў 290 тысяч рублёў (каля 1 млн 232 тысяч даляраў паводле курсу Нацбанка на 10 чэрвеня). Агульная плошча будынка — 4000 квадратных метраў. Таргі прызначаныя на 27 чэрвеня.
У дзіцячага садка на Мірашнічэнкі, 41 — вялікая гісторыя. У 1998 годзе яго закрылі, будынак стаяў закінутым. Потым аб’ект вывелі з разраду дашкольных установаў. Некалькі разоў двухпавярховы будынак мяняў уласнікаў.
У 2010-х яго выкупіў іранскі інвестар, які зарэгістраваў у Беларусі ЗТАА «Бел Стелла Инвест». Тады ўладальнік збіраўся зрабіць унутры офісы. Але жыхары Зялёнага Луга на сходзе абураліся: навошта, калі раёну патрэбны дзіцячы садок? Кампанія «Бел Стелла Инвест», якая была зарэгістраваная пад здачу ў арэнду нерухомасці, была ліквідаваная ў 2015 годзе.