На аўкцыён выставілі комплекс будынкаў на вытворчай пляцоўцы кампаніі «Белабеддинг», размешчаны ў аграгарадку Новая Гожа пад Гроднам. Абвестка апублікаваная на сайце «БелЮрЗабяспечання». Раней экс-дырэктар кампаніі, алімпійскі чэмпіён па гандболе Андрэй Барбашынскі і давераная асоба Аляксандра Лукашэнкі на выбарах 2020 года, скардзіўся, што яго «кінулі» еўрапейскія партнёры.
3 кастрычніка пройдзе аўкцыён па продажы комплексу беларуска-нямецкай фабрыкі матрацаў і падушак «Белабеддинг» у аграгарадку Новая Гожа пад Гроднам. Пачатковая цана — 6,4 млн рублёў. Памяшканні прадпрыемства знаходзяцца на тэрыторыі свабоднай эканамічнай зоны «Гроднаінвест». З абцяжаранняў пазначаныя іпатэка, заклад права арэнды зямельнага ўчастка, забарона на ажыццяўленне рэгістрацыйных дзеянняў.
З гэтай кампаніяй звязаны алімпійскі чэмпіён па гандболе Андрэй Барбашынскі, які быў даверанай асобай Аляксандра Лукашэнкі на выбарах 2020-га. У ліпені гэтага года ў інтэрв'ю дзяржСМІ ён расказаў, што страціў свой бізнес праз нямецкіх партнёраў:
— Усё да агіднага проста: адным цудоўным днём на загад кіраўніцтва галаўнога прадпрыемства мяне не пусцілі на парог фабрыкі, у развіццё якой уклаў велізарную колькасць сіл, часу і душу. На парог выйшаў нейкі мужык і заявіў, што ўпершыню мяне бачыць і не ведае, — заявіў алімпійскі чэмпіён. — Яны [нямецкія партнёры] бывалі ў маім доме, а я ў іх, запэўнівалі ў вечным сяброўстве, усміхаліся ў вочы, а потым, не змяняючы выразу твару, ударылі ў спіну. Але ці здзіўлены я? Мабыць, не. Гэта ж чыста заходняя гісторыя: бізнес і нічога асабістага. Калі ўзнікла дылема «грошы ці чалавечыя адносіны», яны без усялякіх ваганняў выбралі грошы. Так было і так будзе.
Характэрна, што ў інтэрв'ю дзяржСМІ ён кажа пра свой бізнес, хоць насамрэч быў яго кіраўніком (у гэтым ён прызнаваўся раней сам, а таксама гэта вынікае з дакументаў). Як высветліла раней «Люстэрка», у перыяд з траўня 2022 да сакавіка 2024 года ў спісе суўладальнікаў была Ірына Барбашынская — жонка Андрэя Барбашынскага. Да гэтага сярод заснавальнікаў былі дзве нямецкія фірмы — Fey & Co і Feybri. Мяркуючы са звестак Адзінага дзяржрэгістра юрыдычных асобаў, яго самога не было ў спісе заснавальнікаў.
Уладальнікі хацелі ліквідаваць кампанію, але ў выніку адмовіліся ад гэтай ідэі, хутчэй за ўсё, акурат таму, што знайшлі пакупніка.
З сакавіка гэтага года «Белабеддингом» валодае фірма «Экспресс технологии». Яна, у сваю чаргу, належыць Лойку Андрэю Анатольевічу.
Паводле звестак сэрвісу «Картатэка», у кампаніі ёсць пазычанасць па падатках.
Чытайце таксама
