Старшыня Следчага камітэта Беларусі Дзмітрый Гара паведаміў прозвішчы новых абвінавачаных, у дачыненні да якіх будзе адкрытая завочная спецвытворчасць, піша «Sputnik Беларусь».
«Ініцыяваная спецвытворчасць у дачыненні да сапраўдных здраднікаў, людзей, якія нанеслі велізарную шкоду нашай краіне», — паведаміў Гара.
Старшыня СК Беларусі ўдакладніў, што пад дадзенымі характарыстыкамі ён мае на ўвазе таксама Пуцілу, BYPOL і людзей, якія далучыліся да гэтай арганізацыі.
«У тым ліку і здраднік Лупаносаў, які праходзіў службу ў праваахоўных органах. І ў канчатковым выніку здзейсніў здраду дзяржаве, здрадзіў і дзяржаве, і народу», — падкрэсліў Гара, дадаўшы, што назваў прозвішчы асноўных фігурантаў справаў «экстрэмісцкай скіраванасці».
Станіслаў Лупаносаў працаваў у ГУБАЗіК з ліпеня 2020 года, пасля выбараў звольніўся і з’ехаў з краіны. Лупаносаў унесены КДБ у «пералік асобаў, якія маюць дачыненне да тэрарыстычнай дзейнасці», прызнаны абвінавачаным па артыкулах аб замаху на акт тэрарызму і несанкцыянаваным капіяванні інфармацыі — яго абвінавачваюць у перадачы дадзеных BYPOL. Сцяпан Пуціла — адзін са стваральнікаў тэлеграм-канала NEXTA. Унесены КДБ у «пералік асобаў, якія маюць дачыненне да тэрарыстычнай дзейнасці». Супраць Пуцілы распачатыя крымінальныя справы па 10 артыкулах. Улады Беларусі абвясцілі Пуцілу ў міждзяржаўны вышук. Заснавальнік NEXTA ў 2020 годзе атрымаў міжнародную абарону, а ў 2021-м — статус палітычнага ўцекача ў Польшчы.
Што такое спецыяльная вытворчасць
Як тлумачаць на сайце СК, «спецыяльная вытворчасць — вытворчасць па крымінальнай справе ў дачыненні да абвінавачанага, які знаходзіцца па-за межамі Рэспублікі Беларусь і ўхіляецца ад яўкі ў орган, які вядзе крымінальны працэс». То-бок спецвытворчасць фактычна з’яўляецца першым крокам да нядаўна ўзаконеных у Беларусі завочных судоў над тымі, хто знаходзіцца за мяжой.
Разам з абвяшчэннем аб адкрыцці спецыяльнай вытворчасці СК выклікае фігурантаў у Беларусь для правядзення следчых дзеянняў — публікацыя гэтай інфармацыі на сайце ведамства паводле цяперашняга закона лічыцца належным паведамленнем. Усіх іх чакаюць у Мінску ў цэнтральным апараце СК на вуліцы Фрунзе, 19.
Нагадаем, Аляксандр Лукашэнка ў ліпені падпісаў закон пра змены ў Крымінальна-працэсуальны кодэкс, якія дазваляюць судзіць беларусаў, што знаходзяцца за мяжой, завочна і нават асуджаць іх на расстрэл.