Вынікі першага цэнтралізаванага экзамену па рускай і беларускай мовах пракаментаваў міністр адукацыі Андрэй Іванец. Яго каментар увечары 29 траўня апублікавала прэс-служба ведамства.
Міністр адзначыў, што «цяпер распаўсюджваецца вялікая колькасць фэйкаў што да вынікаў першага ЦЭ».
— Напрыклад, хтосьці паведамляе, што колькасць тэставых балаў у некаторых асабістых кабінетах выпускнікоў складае больш за 100 балаў. Кожны такі факт быў правераны, ніводнага пацверджання наяўнасці тэхнічнага збою няма. Міністэрствам адукацыі будзе адсочвацца кожны выпадак распаўсюду недакладнай інфармацыі, матэрыялы будуць накіраваныя для ацэнкі дзеянняў распаўсюднікаў фэйкаў. Інфармацыя пра тое, што будуць перагледжаныя вынікі цэнтралізаванага экзамену, што прынятая адпаведная пастанова Савета Міністраў, — таксама поўны фэйк, — сказаў Іванец.
Кіраўнік адукацыйнага ведамства падкрэсліў, што выпрацаваныя з 2019 года падыходы да методыкі разліку тэставых балаў і шкала пераводу ў 10 балаў, прынятая ў студзені гэтага года, «дазваляюць аб’ектыўна правесці ацэнку ведаў выпускнікоў».
— Пацверджанне гэтага — практычна поўнае супадзенне гадавых адзнак у атэстаце, якія атрымліваюць нашыя выпускнікі, з ацэнкамі, якія яны атрымалі на ЦЭ. Некаторыя выпускнікі і іх бацькі хвалююцца праз тое, што колькасць тэставых балаў у іх адносна невысокая, але методыка разліку балаў была цалкам ідэнтычная леташняй. Усе знаходзяцца ў абсалютна аднолькавых справядлівых умовах. Адпаведна, тая задача, якая стаяла ў рамках правядзення цэнтралізаванага экзамену, а гэта аб’ектыўная ацэнка ведаў выпускнікоў 11-х класаў, выкананая ў поўным аб’ёме. Другая задача ЦЭ — гэта забяспечанне справядлівага адбору для паступлення дзяцей ва ўстановы вышэйшай адукацыі незалежна ад таго, дзе яны пражываюць: у буйным населеным пункце альбо ў дробным — аграгарадку. Дзве гэтыя ўмовы выкананыя цалкам, — сказаў на заканчэнне Андрэй Іванец.
Нагадаем, вынікі ЦЭ па рускай і беларускай мове прыйшлі раніцай 29 траўня. Школьнікі і іх бацькі лічаць, што ў разліках былі памылкі — за адзін-два няправільныя адказы здымалі 15−20 балаў. Як расказвалі нашыя чытачы, па тэлефоне РІКВ казаў пра збой у сістэме і абяцаў пералічыць вынікі.
Пазней прэс-служба Мінадукацыі паведаміла, што РІКВ «яшчэ раз праверыў вынікі ЦЭ, нібыта атрыманыя выпускнікамі, дзе было прастаўлена больш за 100 балаў або дробавыя значэнні».
«Інфармацыя аказалася фэйкавай, такіх вынікаў у базе не было», — адзначылі ў ведамстве.
Чытайце таксама
