У сталічнай транспартнай кампаніі «Мінсктранс», якая ажыццяўляе ў тым ліку міжнародныя пасажырскія перавозкі, расказалі, як будуць ездзіць аўтобусы з Мінска ў Рыгу ў сувязі з закрыццём пункта пропуску «Сілене» на мяжы Беларусі з Латвіяй. Пра гэта гаворыцца на сайце прадпрыемства.
«У сувязі з закрыццём аўтамабільнага пункта пропуску „Сілене“ (Латвія) рэйсы па міжнародным маршруце Мінск — Рыга праз Даўгаўпілс адпраўленнем з Мінска ў 08.40, з Рыгі ў 08.00 з 21 верасня будуць выконвацца праз Вільнюс (Літва)», — гаворыцца ў паведамленні.
Нагадаем, рашэнне закрыць пункт пропуску «Сілене — Урбаны» прыняў 19 верасня ўрад Латвіі ў «сувязі з меркаваннямі бяспекі», з улікам «вялікай колькасці выпадкаў незаконнага перасячэння мяжы паміж Латвіяй і Беларуссю» і «неабходнасцю пераразмеркавання рэсурсаў».
У сярэднім праз «Сілене» заязджаюць 625 чалавек і выязджаюць 605 чалавек за дзень, а таксама заязджаюць і выязджаюць у сярэднім 87 і 85 грузавых аўтамабіляў.
Цяпер на мяжы Беларусі з Латвіяй застаўся толькі адзін дзейны пункт пропуску — «Пяцерніекі» (з беларускага боку — «Грыгароўшчына»).