Суд па заяве пракуратуры прызнаў «экстрэмісцкімі» шэраг украінскіх тэлеграм-каналаў, паведамілі ў прэс-службе пракуратуры.
«Па заявах пракуратуры Стаўбцоўскага раёна інфармацыйная прадукцыя тэлеграм-каналаў STERNENKO, PETLYARIS, + Вертикаль і „Скринька Пандори“ прызнаная судом экстрэмісцкімі матэрыяламі. У гэтых каналах размяшчалася інфармацыя, скіраваная на распальванне палітычнай і нацыянальнай варожасці ў дачыненні да Беларусі і Расіі, беларускага і расійскага народаў, дапускаліся публікацыі з абразамі кіраўніка дзяржавы», — гаворыцца ў паведамленні пракуратуры.
Таксама ў ведамстве дадалі, што «экстрэмісцкім» прызнаны тэлеграм-канал «Arischer Weg | Арийский Путь». У пракуратуры заявілі, што ў ім размяшчаліся звесткі, скіраваныя «на рэабілітацыю нацызму і прапаганду нацысцкіх поглядаў».
«Ва ўсіх названых тэлеграм-каналаў замежны след», — падсумавалі ў ведамстве.