Мінскі дзяржаўны ўніверсітэт (МДЛУ) сутыкнуўся з сур’ёзнай праблемай у выглядзе масавых адлічэнняў студэнтаў — за паўтара года адтуль забрала дакументы больш чым тысяча чалавек, паведамляе «Нашай Ніва» са спасылкай на свае крыніцы ў сістэме адукацыі.
Паводле звестак выдання, з пачатку 2022 года да восені 2023-га з МДЛУ з уласнага жадання адлічылася больш за 1000 студэнтаў дзённай і завочнай формы разам з мэтавікамі. Гэта антырэкорд за сучасную гісторыю ўніверсітэта, адзначаюць суразмоўцы «Нашай Нівы».
Паводле іх, сярод добраахвотна адлічаных больш за ўсё студэнтаў дзённай формы навучання — каля 900 чалавек. Таксама забрала дакументы больш за 100 чалавек з завочнай формы навучання і дзясятак тых, хто вучыцца па мэтавым скіраванні.
За 2024 год інфармацыі пакуль няма, бо МДЛУ яшчэ не падаваў яе ў Мінадукацыі, кажуць крыніцы.
«Частка страчаных студэнтаў, якія сышлі з уласнага жадання, кампенсуецца за кошт новых уступных кампаній і абітурыентаў, бо ў многіх няма фінансавай магчымасці вучыцца за мяжой.
Аднак усё роўна існуе недабор, асабліва гэта датычыць завочнікаў. Так, згодна з вызначанай для МДЛУ дзяржаўнай ліцэнзіяй на колькасць студэнтаў (яна патрабуе наяўнасці ў ВНУ 6320 студэнтаў дзённай формы і 2070 завочнікаў), ВНУ на канец 2023 года не хапала больш за 500 студэнтаў дзённай формы і больш за 1000 завочнікаў», — расказваюць крыніцы выдання.
Нагадаем, з недаборам студэнтаў сутыкаюцца і іншыя ВНУ краіны, што публічна прызнаюць і ў Мінадукацыі. Так, міністр адукацыі Андрэй Іванец на Рэспубліканскім педсавеце 27 жніўня расказаў, што па выніках уступнай кампаніі 2024 года беларускія ВНУ агулам недабралі каля 870 чалавек, у асноўным на сельскагаспадарчыя і інжынерныя спецыяльнасці. Гэта выклікала абурэнне Аляксандра Лукашэнкі, які паскардзіўся, што сёння абітурыентаў «ледзь не заганяюць» вучыцца, а іх усё роўна не хапае.
Пра недабор студэнтаў афіцыйна паведамлялася і ў папярэднія гады. Пасля ўступнай кампаніі 2021 года Мінадукацыі адрапартавала, што ўніверсітэтам не хапала каля 5 тысяч студэнтаў усіх формаў навучання, з іх на бюджэтныя месцы недабралі каля 500 чалавек (аднак пасля дадатковых набораў, паводле ведамства, агульная колькасць недабору істотна знізілася).
У 2022 годзе ў Мінадукацыі заявілі, што недабор у ВНУ склаў менш за 1% ад усіх месцаў.
Пра недабор па шэрагу спецыяльнасцяў паведамлялі і летась — так, у БДУ частка бюджэтных месцаў засталася незанятая.
