Актораў Рэспубліканскага тэатра беларускай драматургіі (РТБД) у Мінску звольнілі з тэатра, паведамляе «Наша Ніва» са спасылкай на некалькі сваіх крыніц з тэатральнага кола.
Яшчэ днём 31 кастрычніка ў раздзеле «Асобы» сайта тэатра віселі партфоліа актораў Максіма Брагінца, Дзмітрыя Давідовіча і Арцёма Курэня, але цяпер іх адтуль прыбралі, піша выданне.
«Наша Ніва» адзначае, што на гэтым трыа трымалася значная частка самых касавых, папулярных у гледачоў спектакляў, таму ў тэатры працягваюцца вымушаныя замены ў рэпертуары. Замяніць актораў папросту няма кім. А ў тэатральным асяроддзі абмяркоўваецца, што чарговыя чысткі раўназначныя знішчэнню тэатра, заўважае выданне.
Нагадаем, пра затрыманне актораў РТБД стала вядома 19 кастрычніка. «Наша Ніва» пісала, што іх асудзілі па арт. 19.1 КаАП (Дробнае хуліганства) на некалькі сутак. Акрамя Давідовіча, Курэня і Брагінца затрымалі таксама адну акторку, але пазней яе адпусцілі да дзіцяці. Пад рэпрэсіі таксама трапіла былая кіраўніца тэатра.
Што адбываецца ў РТБД?
Рэдакцыі «Люстэрка» ад уласных крыніц стала вядома пра звальненне Святланы Карукінай з пасады дырэктаркі Рэспубліканскага тэатра беларускай драматургіі. Паводле іх інфармацыі, гэта адбылося яшчэ ў ліпені гэтага года. Пацверджаннем гэтага сталі змены на сайце тэатра. Прозвішча і партрэт Карукінай адтуль зніклі.
Апошнім часам РТБД заставаўся адным з самых папулярных беларускіх калектываў. Аднак рэпрэсіі не абмінулі і яго.
Увосень 2020 года РТБД пакінулі акторы Мікалай Сонька і Андрэй Новік. Першы зрабіў гэта на знак пратэсту супраць цэнзуры. Другі — «на знак салідарнасці са страйкоўцамі і звольненымі». У траўні 2021 года з краіны з’ехаў Ілля Ясінскі. У 2020-м ён удзельнічаў у пратэсных маршах. Падчас аднаго з іх яго затрымалі і зламалі пазванкі. У канцы снежня 2021 года звольнілі мастацкага кіраўніка тэатра Аляксандра Гарцуева. Ён узначальваў РТБД з 2012 года.
У сакавіку — пачатку красавіка 2022 года з тэатра сышлі або былі звольненыя чацвёра актораў: Алена Баярава, Марыя Пятровіч, Марына Здаранкова і Максім Шышко. Апошняга 27 лютага затрымлівалі на антываеннай дэманстрацыі.
Адзначым, апошнім часам звальненні ў беларускіх тэатрах зрабіліся рэгулярнымі. У пачатку красавіка 2024 года быў звольнены мастацкі кіраўнік віцебскага тэатра «Лялька» Віктар Клімчук. У сакавіку — дырэктар сталічнага Музычнага тэатра Сяргей Пукіта. У красавіку страціў пасаду і дырэктар Беларускага тэатра лялек Дзмітрый Сямёнаў. Праўда, пазней высветлілася, што ён пайшоў на павышэнне — стаў намеснікам кіраўніка ўпраўлення культуры Мінгарвыканкама. У траўні быў звольнены мастацкі кіраўнік Нацыянальнага тэатра оперы і балета Валянцін Елізар'еў.
Чытайце таксама
