У Мінскім абласным судзе пачынаецца судовы працэс над каталіцкім святаром Генадзем (Генрыхам) Акалатовічам.
Паседжэнні будуць праходзіць у закрытым рэжыме.
64-гадовы пробашч касцёла Святога Іосіфа ў Валожыне Генрых Акалатовіч абвінавачваецца па ч.1 арт. 356 КК (Здрада дзяржаве).
Ён быў прызнаны палітвязнем.
Акалатовіча затрымалі ў лістападзе 2023 года. Святара абвінавачваюць у дзяржаўнай здрадзе праз тое, што ён нібыта перадаў камусьці нейкую сакрэтную інфармацыю і тым самым нанёс шкоду на вельмі буйную суму, якую ад яго патрабуюць кампенсаваць.
Сярод вернікаў называюць лічбу каля 1 млн еўра — то-бок больш за 3 млн рублёў у эквіваленце. У парафіі абмяркоўваюць, што ў якасці кампенсацыі шкоды збіраюцца забраць усе грошы, канфіскаваныя падчас арышту ксяндза, — яго асабістыя зберажэнні і ахвяраванні парафіі.
Інфармацыя пра крымінальны пераслед ксяндза была даведзеная да Ватыкана, але пакуль гэта не дало ніякага эфекту, хоць святар спадзяваўся на заступніцтва папы рымскага. Парафіяне спадзяюцца, што пасля прысуду пробашча касцёла памілуюць з прычыны яго сталага ўзросту і слабага здароўя.
Генрых Акалатовіч — вядомы і паважаны ў Беларусі святар, які яшчэ за савецкімі часамі дапамагаў адраджаць каталіцкі касцёл ў рэгіёнах. Ён не раз станавіўся героем публікацый і сюжэтаў дзяржаўнай прэсы, у адным з матэрыялаў падкрэслівалася, што ксёндз размаўляе па-беларуску не толькі ў парафіі, але і дома.