У Акруговым судзе Варшавы 13 студзеня прайшлі спрэчкі бакоў па справе 23-гадовага грамадзяніна Польшчы Дарыяна С., які напаў на беларуску ў цэнтры польскай сталіцы ў лютым мінулага года. Мужчыну абвінавацілі ў згвалтаванні, забойстве і разбоі. Сённяшняе паседжанне праходзіла ў закрытым рэжыме. Расказваем, якога тэрміну просіць пракуратура, што заявілі прадстаўнікі пацярпелых і калі агучаць прысуд.
Акруговы суд Варшавы прызначыў дату абвяшчэння прысуду па справе грамадзяніна Польшчы Дарыяна С. мужчыну абвінавачваюць у згвалтаванні і забойстве беларускі Лізаветы Герцэн у лютым мінулага года. На закрытых для прэсы і гледачоў спрэчках бакоў пракуратура папрасіла для яго пажыццёвага зняволення і 200 тысяч злотых (167 тысяч беларускіх рублёў, тут і далей сумы паводле курсу Нацбанка на 13 студзеня) кампенсацыі кожнаму пацярпеламу — гэта брат і хлопец забітай.
Суд агучыць прысуд 17 студзеня ў 14.15 паводле мінскага часу.
— Сёння слуханні ўсё яшчэ праходзілі ў закрытым рэжыме. Цяпер справа завершаная. Бакі выступілі з заключнымі прамовамі, і такім чынам судовае разбіральніцтва падышло да канца, — заявіў журналістам адвакат брата і хлопца Лізаветы Герцэн Караль Дрождж. — Мы патрабуем пажыццёвага зняволення. Улічваючы характар справы, яе ход і паводзіны злачынца, нам здаецца, што гэта адзіны варыянт абараніць грамадства ад такіх зламыснікаў, якія знаходзяцца на волі. Рызыка таго, што ён здзейсніць падобнае ў будучыні, вельмі высокая. Сёння ў сваёй заключнай прамове абвінавачаны ўпершыню прадэманстраваў раскаянне. Прынамсі, вусна. Гэта была нядоўгая прамова — ён вымавіў два сказы, у якіх папрасіў прабачэння.
Нагадаем, паводле звестак следства, у ноч з 24 на 25 лютага мужчына напаў на беларуску ў цэнтры Варшавы. Ён прыставіў ёй нож да горла, згвалціў і спрабаваў яе задушыць. Дзяўчыну знайшлі без прытомнасці на лесвічнай клетцы дома № 47 на вуліцы Журавя ў Варшаве. Яна памерла ў бальніцы Варшаўскага медыцынскага ўніверсітэта праз чатыры дні, 1 сакавіка.
Лізавету пахавалі ў Варшаве 15 сакавіка 2024 года. Праз тыдзень пасля забойства ў цэнтры польскай сталіцы прайшоў марш «Яе звалі Ліза» ў памяць пра беларуску.
Па падазрэнні ў замаху на забойства, спалучанае са згвалтаваннем і разбоем, паліцыя затрымала 23-гадовага варшавяніна Дарыяна С. Мужчыну ўзялі пад варту.
4 снежня 2024 года ў Акруговым судзе Варшавы пачаўся суд над Дарыянам С. Мужчыну інкрымінавалі забойства на сэксуальнай глебе. Яму пагражае ад 12 гадоў да пажыццёвага пазбаўлення волі.
На першым жа паседжанні Дарыян С. часткова прызнаў віну, але сказаў, што намеру забіваць у яго не было. Ён заявіў суду, што мусіў заплаціць 1600 злотых (1336 беларускіх рублёў) за кватэру, але грошай не было. Паляк хацеў абкрасці краму ці бар. У судзе ён заявіў, што адной з установаў убачыў украінцаў, думаў іх абакрасці, але ў выніку сутыкнуўся з беларускай.
Чытайце таксама
Чытайце таксама
