Уладзімір Пуцін даручыў Сяргею Шайгу ўвесці з 12.00 6 студзеня да 24.00 7 студзеня рэжым спынення агню па ўсёй лініі баявога судакранання бакоў ва Украіне. Пра гэта паведамілі ў Крамлі.
У дакуменце адзначаецца, што рашэнне пра рэжым спынення агню па ўсёй лініі баявога судакранання бакоў ва Украіне прынятае з улікам звароту патрыярха Кірыла. Рэжым будзе дзейнічаць з 12.00 6 студзеня 2023 года да 24.00 7 студзеня 2023 года.
«Зыходзячы з таго, што ў раёнах баявых дзеянняў пражывае вялікая колькасць грамадзян, якія вызнаюць праваслаўе, заклікаем украінскі бок абвясціць рэжым спынення агню і даць ім магчымасць наведаць службы напярэдадні, а таксама ў Дзень Раства Хрыстова», — гаворыцца ў паведамленні.
Нагадаем, сёння, 5 студзеня кіраўнік Рускай праваслаўнай царквы (РПЦ) патрыярх Кірыл заклікаў спыніць агонь і ўсталяваць каляднае перамір'е ва Украіне і на Данбасе.
«Я, Кірыл, Патрыярх Маскоўскі і ўсяе Русі, звяртаюся да ўсіх бакоў, уцягнутых у міжусобны канфлікт, з заклікам спыніць агонь і ўсталяваць каляднае перамір'е з 12.00 6 студзеня да 24.00 7 студзеня, каб праваслаўныя людзі маглі наведаць службы напярэдадні і ў дзень Раства Хрыстова», — заявіў ён у звароце, апублікаваным на сайце РПЦ.