У Мінабароны Расіі зноў адмаўляюць нанясенне ўдараў па жылых дамах, заявіўшы, што ў Краматорску знішчылі амерыканскія пускавыя ўстаноўкі М-142 HIMARS і М-270 MLRS. У Генштабе УСУ расказалі, што войска РФ 1 лютага ўдарыла ракетамі па цывільнай інфраструктуры Славянска, Краматорска і Дружкоўкі Данецкай вобласці. У Інстытуце па вывучэнні вайны адзначаюць, што Пуцін, імаверна, імкнецца прымусіць Украіну разгрупаваць свае сілы перад магчымым расійскім наступам.
Расказваем пра галоўнае са зводак штабоў і высноваў экспертаў на 344-ы дзень вайны ва Украіне.
Генштаб УСУ: адбілі атакі каля 14 населеных пунктаў
За мінулыя суткі расійскія войскі нанеслі шэсць ракетных (чатыры з іх — па цывільнай інфраструктуры Славянска, Краматорска і Дружкоўкі Данецкай вобласці), а таксама чатыры авіяцыйныя ўдары. Правялі 73 абстрэлы з рэактыўных сістэм залпавага агню. Ёсць ахвяры сярод мірнага насельніцтва, паведамляе Генштаб УСУ ў ранішняй зводцы.
— На Валынскім, Палескім, Северскім і Слабажанскім напрамках расійскія войскі абстралялі раёны 17 населеных пунктаў; на Купянскім напрамку з танкаў і артылерыі абстраляныя раёны 10 населеных пунктаў; на Ліманскім напрамку пад абстрэлы трапілі пяць населеных пунктаў; на Бахмуцкім — 11; на Аўдзееўскім — дзевяць; на Навапаўлаўскім напрамку артылерыйскім абстрэлам падвергліся шэсць населеных пунктаў, у тым ліку Вуглядар; на Запарожскім напрамку расіяне абстралялі больш за 20 населеных пунктаў; на Херсонскім — чатыры.
— Праціўнік актыўна вядзе разведку, на асобных напрамках рыхтуецца да наступу. Нягледзячы на вялікія страты, працягвае спробы наступаць на Ліманскім, Бахмуцкім, Аўдзееўскім і Навапаўлаўскім напрамках.
— За мінулыя суткі УСУ адбілі атакі праціўніка ў раёнах населеных пунктаў Навасёлаўскае, Плашчанка, Неўскае, Чырвонапапоўка, Дзіброва, Кузьміно і Белагораўка Луганскай вобласці і Спірнае, Белагораўка, Васюкоўка, Благадатнае, Чырвоная Гара, Бахмут і Кляшчэўка Данецкай вобласці.
— Падраздзяленні ракетных войскаў і артылерыі Сіл абароны нанеслі ўдары па пункце кіравання, трох раёнах канцэнтрацыі жывой сілы і складзе гаруча-змазачных матэрыялаў расійскіх войскаў.
Паводле звестак Генштаба, жыхароў акупаваных тэрыторый Данецкай вобласці прымушаюць браць расійскае грамадзянства. Так, у Горлаўцы работнікам транспартных прадпрыемстваў без расійскага пашпарта адмаўляюцца выдаваць пасведчанні кіроўцы, пагражаюць звальненнем.
У Луганскай вобласці пасля заканчэння трохмесячных кантрактаў не могуць звольніцца каля 300 расійскіх вайскоўцаў аднаго з падраздзяленняў, да таго ж ім не выплацілі належнае грашовае забяспечанне, заявілі ва ўкраінскім Генштабе.
Мінабароны РФ: знішчылі амерыканскія пускавыя ўстаноўкі
У Міністэрстве абароны Расіі заявілі, што ў выніку ўдару па Краматорску знішчылі амерыканскія пускавыя ўстаноўкі М-142 HIMARS і М-270 MLRS (украінскі бок паведаміў пра траплянне ракеты ў жылы дом: загінулі тры чалавекі, пацярпелі 18. — Заўв. рэд.).
— На Купянскім напрамку авіяцыя і артылерыя «Заходняй» групоўкі войскаў нанеслі агнявое паражэнне падраздзяленням 92-й механізаванай брыгады УСУ ў раёне населенага пункта Навасёлаўскае Луганскай вобласці. Знішчаныя больш за 25 вайскоўцаў, баявая браніраваная машына і два аўтамабілі. Акрамя таго, у раёне населенага пункта Ваўчанск Харкаўскай вобласці нанесенае паражэнне тром украінскім баявым машынам РСЗА «Град».
— На Чырвона-Ліманскім напрамку ў выніку агню артылерыі і паспяховых наступальных дзеянняў падраздзяленняў групоўкі войскаў «Цэнтр» нанесенае паражэнне падраздзяленням 95-й дэсантна-штурмавой брыгады УСУ ў раёне населенага пункта Кармазінаўка Луганскай вобласці, а таксама Серабранскага лясніцтва. Страты УСУ на гэтым напрамку за суткі склалі звыш 100 вайскоўцаў, шэсць баявых браніраваных машын і гаўбіца Д-30.
— На Данецкім напрамку працягваюцца наступальныя дзеянні падраздзяленняў «Паўднёвай» групоўкі войскаў. Авіяцыя, ракетныя войскі і артылерыя нанеслі паражэнне падраздзяленням 59-й мотапяхотнай брыгады УСУ і 3-й брыгады Нацгвардыі ў раёнах населеных пунктаў Першамайскае і Васюкоўка Данецкай вобласці. Знішчаныя да 50 вайскоўцаў, адзін танк, бронетранспарцёр, два пікапы, гаўбіца «Мста-Б» і гаўбіца Д-30.
— На Паўднёва-Данецкім і Запарожскім напрамках у выніку агню артылерыі і актыўных дзеянняў групоўкі войскаў «Усход» знішчаныя больш за 65 украінскіх вайскоўцаў 110-й брыгады тэрытарыяльнай абароны ў раёне населенага пункта Палтаўка Запарожскай вобласці і 72-й механізаванай брыгады ў раёне населенага пункта Вуглядар Данецкай вобласці. Таксама за суткі знішчаныя чатыры баявыя браніраваныя машыны і два аўтамабілі УСУ.
— На Херсонскім напрамку ў выніку агню артылерыі ў раёнах горада Херсон і населенага пункта Зміеўка Херсонскай вобласці знішчаныя два склады боепрыпасаў УСУ.
Усяго за суткі, паводле МА РФ, нанесенае паражэнне 78 артылерыйскім падраздзяленням, жывой сіле і ваеннай тэхніцы УСУ ў 105 раёнах. Знішчаная радыёлакацыйная станцыя выяўлення малавышынных цэляў 35Д6, а таксама радыёлакацыйная станцыя контрбатарэйнай барацьбы вытворчасці ЗША AN/TPQ-37.
Збіта чатыры рэактыўныя снарады сістэмы залпавага агню HIMARS і пяць беспілотных лётных апаратаў.
Інстытут па вывучэнні вайны: Пуцін імкнецца заручыцца падтрымкай насельніцтва РФ для зацяжной вайны ва Украіне
Украінскія афіцыйныя асобы працягваюць папярэджваць пра намер Расіі правесці наступальную аперацыю на Данбасе ў лютым і/або сакавіку. Гэта супадае з раней агучанымі ацэнкамі ISW пра самы імаверны сцэнар развіцця падзей, гаворыцца ў зводцы амерыканскага Інстытута па вывучэнні вайны.
Эксперты не выключаюць, што пры гэтым Уладзімір Пуцін можа ствараць умовы для далейшых рэйдаў расійскіх сіл праз мяжу ў паўночна-ўсходнія раёны Украіны, каб прыкаваць частку ўкраінскіх сіл да паўночных памежных раёнаў. Так, напярэдадні Пуцін правёў нараду па аднаўленні інфраструктуры ў Крыме, Белгародскай, Бранскай і Курскай абласцях пасля «абстрэлаў неанацысцкімі фарміраваннямі». Тым самым ён прасоўвае інфармацыйную аперацыю, скіраваную на тое, каб прадставіць вайну ва Украіне як экзістэнцыяльную пагрозу для расійскіх грамадзян, каб заручыцца ўнутранай падтрымкай зацяжной вайны, кажуць эксперты. У ISW таксама адзначаюць, што па-ранейшаму лічаць: расійскае ўварванне з Беларусі вельмі малаімавернае, а пагроза рэйдаў з Белгародскай, Бранскай і Курскай абласцей на поўнач і паўночны ўсход Украіны — імаверна, спроба прымусіць Украіну перакінуць у гэтыя раёны дадатковыя падраздзяленні для абароны і тым самым разгрупаваць іх перад магчымай расійскай наступальнай аперацыяй.
На што яшчэ звярнулі ўвагу эксперты:
- расійскія войскі працягвалі наземныя атакі да паўночны ўсход і паўднёвы захад ад Бахмута;
- расійскія войскі працягвалі абмежаваныя наземныя атакі, каб аднавіць страчаныя пазіцыі на лініі Сватава — Крамянная 1 лютага;
- расійскія сілы працягваюць праводзіць беспаспяховыя аперацыі на астравах у дэльце ракі Днепр у Херсонскай вобласці, спрабуючы не дапусціць пранікнення туды ўкраінскіх сіл;
- тэмпы набору зняволеных у ПВК Вагнера, магчыма, замарудзіліся;
- крымскія партызаны маглі здзейсніць тэракт з ужываннем самаробнай выбуховай прылады ў акупаваным Крыме 30 студзеня.
