Прэс-служба Яўгена Прыгожына апублікавала яго інтэрв'ю. У ім уладальнік ПВК Вагнера заявіў, што вайна была патрэбная не для «дэнацыфікацыі» і «дэмілітарызацыі» Украіны і не для вяртання «расійскіх тэрыторый», а для задавальнення амбіцый асобных людзей. Усю віну за пачатак вайны Прыгожын усклаў на міністра абароны Расіі Сяргея Шайгу і расійскіх алігархаў.
Прыгожын заявіў, што сітуацыя на Данбасе не была прычынай уварвання Расіі ў лютым 2022 года, бо яна не мянялася ўсе восем гадоў.
— Мы білі па іх (па УСУ. — Заўв. рэд.), яны білі па нас (так званых вайсковых частках самаабвешчаных рэспублік Данбаса. — Заўв. рэд.). Усё гэта адбывалася ўсе гэтыя доўгія восем гадоў — з 2014 па 2022 год. Часам нарастала колькасць абменаў стрэламі, часам — памяншалася. На 24 лютага нічога звышардынарнага не было, — заявіў Прыгожын.
Ён падкрэсліў, што ўсе гэтыя восем гадоў сітуацыя на Данбасе «была замарожаная», і, замест таго каб яе вырашаць, Данбас з 2014 года «распілоўвалі» і «раскрадалі» прадстаўнікі Адміністрацыі прэзідэнта, ФСБ, алігархі, вайсковыя начальнікі.
Паводле яго, цяпер Мінабароны «спрабуе падмануць грамадскасць і прэзідэнта», што з боку Украіны «была шалёная агрэсія і яны збіраліся з усім блокам NATO на нас напасці».
Словы пра «дэмілітарызацыю» і «дэнацыфікацыю"Прыгожын таксама назваў непераканаўчымі, адзначыўшы, што «Зяленскі, калі стаў прэзідэнтам, быў гатовы на любыя дамоўленасці, усё, што трэба было зрабіць, — гэта злезці з Алімпа, пайсці і дамовіцца».
— Вайна была патрэбная для таго, каб купка мярзотнікаў проста патрыумфавала і папіярылася, паказаўшы, якая яна — моцная армія. Каб Шайгу атрымаў маршала (і гэты ўказ ужо быў гатовы), атрымаў другую зорку Героя. Бо яму вельмі хацелася ўвайсці ў гісторыю як вялікі тувінскі военачальнік, які стаў двойчы Героем і маршалам фактычна ў мірны час.
Паводле Прыгожына, вайна таксама была патрэбная алігархам — «таму клану, які сёння фактычна кіруе Расіяй».
— Дык вось, другой мэтай аперацыі было прызначэнне прэзідэнтам Украіны Медведчука (Віктар Медвядчук — украінскі алігарх і кум Пуціна, якога аддалі Расіі ў абмен на абаронцаў «Азоўсталі». — Заўв. рэд.).
Прыгожын заявіў, што пасля прыходу Медведчука да ўлады ўсе ўкраінскія актывы планавалі падзяліць паміж прадстаўнікамі таго самага «алігархічнага клана»: «Кралі на Данбасе пачкамі, але захацелася больш».
Прыгожын пацвердзіў, што пасля захопу ўкраінскіх абласцей пачалося іх рабаванне — у «бок Расіі» вывозілі тэхніку, метал, абсталяванне і інш.
— Нашая «свяшчэнная вайна» з тымі, хто крыўдзіць рускі народ, хто яго спрабуе зняважыць, ператварылася проста ў рэкет, а дакладней — у крысятніцтва, узведзенае ў ранг закона, у ранг нацыянальнай ідэалогіі.
Нагадаем, Расія напала на Украіну 24 лютага 2022 года. У экстранным звароце да расіян з нагоды пачатку вайны Пуцін заявіў пра пагрозу Расіі праз пашырэнне NATO на ўсход, стварэнне варожай «анты-Расіі» на прылеглых тэрыторыях, нагадаў, што самаабвешчаныя ЛНР і ДНР звярнуліся да Крамля з просьбай абараніць людзей, «якія цягам васьмі гадоў зазнаюць здзекі, генацыд з боку кіеўскага рэжыму», і сказаў, што Расія будзе імкнуцца «да дэмілітарызацыі і дэнацыфікацыі Украіны».
