Расійская армія і УСУ вялі наступальныя дзеянні на рубяжы Купянск — Сватава — Крамянная і ў раёне Бахмута. Расіяне занялі пазіцыі на поўдзень ад Крамянной, УСУ прасунуліся ў раёне Бахмута. Расказваем, пра што яшчэ гаворыцца ў зводках штабоў праціўнікаў, і пра высновы экспертаў на 517-ы дзень вайны ва Украіне.
Генштаб УСУ: Пабілі пункты кіравання праціўніка
Расійская армія працягвае ігнараваць законы і звычаі вайны і выкарыстоўвае тактыку тэрору супраць мірнага насельніцтва Украіны. Пра гэта гаворыцца ў зводцы Генеральнага штаба УСУ. Уначы РФ нанесла чарговы ўдар іранскімі ўдарнымі БПЛА тыпу Shahed, за дзень — адзін ракетны і 72 авіяцыйныя ўдары, правяла больш за 50 абстрэлаў з рэактыўных сістэм залпавага агню. Ёсць загінулыя і параненыя сярод цывільнага насельніцтва, у тым ліку дзеці.
— За мінулыя суткі адбылося больш за 35 баявых сутыкненняў з праціўнікам.
— На Северскім і Слабажанскім напрамках армія Расіі нанесла авіяцыйныя ўдары ў раёнах Гур’еў Казачок і Пясчанае Харкаўскай вобласці. Абстраляла з мінамётаў і артылерыі больш за 30 населеных пунктаў Чарнігаўскай, Сумскай і Харкаўскай абласцей.
— На Купянскім напрамку авіяўдары зафіксаваныя ля трох населеных пунктаў, а артылерыйскім і мінамётным абстрэлам падвергліся сем населеных пунктаў Харкаўскай вобласці.
— На Ліманскім напрамку расійскія войскі нанеслі авіяўдары ў раёнах шасці і абстралялі шэсць населеных пунктаў Луганскай і Данецкай абласцей.
— На Бахмуцкім напрамку УСУ адбілі атакі праціўніка ў раёнах на паўночны захад ад Арэхава-Васільеўкі, на поўдзень ад Іванаўскага і на захад ад Кляшчэеўкі. Расійскія войскі нанеслі авіяўдары ў раёнах Дыліеўкі і Прадцечына Данецкай вобласці, ад расійскіх артылерыйскіх абстрэлаў пацярпелі больш за дзесяць населеных пунктаў Данецкай вобласці.
— На Аўдзееўскім напрамку УСУ адбілі атакі расійскіх войскаў у раёне Першамайскага. Праціўнік нанёс авіяўдары каля трох і абстраляў з артылерыі больш за дзесяць населеных пунктаў Данецкай вобласці.
— На Мар'інскім напрамку Сілы абароны працягваюць стрымліваць наступ расійскіх войскаў у раёнах Краснагораўкі і Мар'інкі. Праціўнік абстраляў больш за дзесяць населеных пунктаў Данецкай вобласці.
— На Шахцёрскім напрамку расійскія войскі вялі беспаспяховыя наступальныя дзеянні ў раёне Раўнаполя Данецкай вобласці. Абстралялі больш за дзесяць населеных пунктаў Данецкай вобласці.
— На Запарожскім і Херсонскім напрамках асноўныя намаганні расійскія войскі засяроджваюць на недапушчэнні далейшага прасоўвання УСУ. Праціўнік нанёс авіяўдары ў раёнах трох населеных пунктаў Запарожскай вобласці. Абстраляў больш за 35 населеных пунктаў Запарожскай, Херсонскай вобласці і горад Херсон.
У той жа час Сілы абароны Украіны працягваюць вядзенне наступальнай аперацыі на Мелітопальскім і Бярдзянскім напрамках, замацоўваюцца на дасягнутых рубяжах.
— Авіяцыя Сіл абароны нанесла ўдар па пункце кіравання, восем удараў па раёнах канцэнтрацыі асабовага складу і шэсць — па зенітна-ракетных комплексах расійскіх войскаў.
— Знішчаныя тры ўдарныя БПЛА тыпу Shahed-136.
— Падраздзяленні ракетных войскаў і артылерыі пабілі чатыры пункты кіравання, тры сродкі супрацьпаветранай абароны, дзевяць артылерыйскіх сродкаў на агнявых пазіцыях і чатыры станцыі радыёэлектроннай барацьбы расійскіх сіл.
Мінабароны РФ: Захапілі населены пункт Сяргееўка
УСУ працягнулі спробы наступаць на Данецкім, Чырвоналіманскім і Паўднёва-Данецкім напрамках, заявілі ў Міністэрстве абароны Расіі.
— На Данецкім напрамку падраздзяленні Паўднёвай групоўкі войскаў адбілі восем атак УСУ ў раёнах населеных пунктаў Белагораўка Луганскай і Зайцава, Першамайскае, Мар'інка і Кляшчэеўка Данецкай вобласці. Акрамя таго, нанесенае паражэнне падраздзяленням 28-й, 54-й механізаваных, 80-й дэсантна-штурмавой брыгад УСУ і 107-й брыгады тэрытарыяльнай абароны ў раёнах населеных пунктаў Грыгораўка і Канстанцінаўка Данецкай вобласці.
Таксама ў раёнах населеных пунктаў Грыгораўка і Спірнае Данецкай вобласці знішчаныя склады боепрыпасаў 3-й штурмавой брыгады УСУ і 4-га батальёна аператыўнага прызначэння Нацгвардыі Украіны.
— На Чырвоналіманскім напрамку дзеяннямі падраздзяленняў групоўкі войскаў «Цэнтр» адбітыя чатыры атакі УСУ ў раёнах населеных пунктаў Неўскае, Нававодскае Луганскай і Тарское Данецкай вобласці. Падраздзяленнямі 15-й мотастралковай брыгады захоплены населены пункт Сяргееўка. Агульнае прасоўванне расійскіх войскаў склала да чатырох кіламетраў па фронце і да двух кіламетраў у глыбіню баявых парадкаў УСУ.
У раёне Серабранскага лясніцтва падраздзяленні 234-га дэсантна-штурмавога палка адбілі атаку ўкраінскіх сіл і перайшлі ў контратаку, прасунуўшыся на 1,5 км у глыбіню абароны УСУ.
У раёне населенага пункта Тэрны Данецкай вобласці спыненая дзейнасць украінскай дыверсійна-разведвальнай групы. Таксама нанесенае паражэнне жывой сіле і тэхніцы 21-й, 63-й, 67-й механізаваных брыгад УСУ, а таксама 5-й брыгады аператыўнага прызначэння Нацгвардыі Украіны ў раёнах населеных пунктаў Тэрны, Тарское і Ямпалоўка Данецкай вобласці.
У раёнах населеных пунктаў Тарское Данецкай і Навалюбаўка Луганскай абласцей знішчаныя склады боепрыпасаў 44-й мотапяхотнай брыгады УСУ і 100-й брыгады тэрытарыяльнай абароны.
— На Паўднёва-Данецкім напрамку ўдарамі авіяцыі, агнём артылерыі групоўкі войскаў «Усход» за суткі паспяхова адбітыя чатыры атакі праціўніка ў раёне населенага пункта Старамаёрскае Данецкай вобласці. У раёне населенага пункта Новаіванаўка Запарожскай вобласці пабітыя жывая сіла і тэхніка 110-й брыгады тэрытарыяльнай абароны.
— На Запарожскім напрамку нанесенае паражэнне падраздзяленням 33-й і 47-й механізаваных брыгад, 35-й брыгады марской пяхоты УСУ, 108-й і 129-й брыгад тэрытарыяльнай абароны ў раёнах населеных пунктаў Зялёны Гай, Мірнае, Арэхаў, Малая Такмачка і Пяціхаткі Запарожскай вобласці. Акрамя таго, у раёне населенага пункта Даражнянка Запарожскай вобласці спыненая дзейнасць трох украінскіх дыверсійна-разведвальных груп.
У раёнах населеных пунктаў Малая Такмачка і Арэхаў Запарожскай вобласці знішчаныя склады боепрыпасаў і паліва 33-й механізаванай брыгады УСУ і 15-й брыгады аператыўнага прызначэння Нацгвардыі Украіны.
— На Купянскім напрамку авіяцыяй, артылерыяй Заходняй групоўкі войскаў нанесенае паражэнне жывой сіле і тэхніцы 14-й, 43-й механізаваных брыгад УСУ і 103-й брыгады тэрытарыяльнай абароны ў раёнах населеных пунктаў Малчанава, Петрапаўлаўка, Бераставое, Кіслоўка Харкаўскай вобласці і Стальмахоўка Луганскай вобласці.
Усяго за суткі, паводле МА РФ, нанесенае паражэнне 113 артылерыйскім падраздзяленням, жывой сіле і ваеннай тэхніцы УСУ ў 122 раёнах.
Акрамя таго, у раёне населенага пункта Вязавок Чаркаскай вобласці пабіты пункт часовай дыслакацыі замежных добраахвотнікаў. У раёне населенага пункта Чудноў Жытомірскай вобласці знішчаныя склады боепрыпасаў, узбраення і ваеннай тэхнікі, дастаўленых на Украіну з заходніх краін.
Таксама пабітыя пункты кіравання 42-й, 63-й механізаваных брыгад і 35-й брыгады марской пяхоты УСУ ў раёнах населеных пунктаў Першамайскае і Тарское Данецкай вобласці.
Сродкамі СПА ў раёне населенага пункта Навадараўка Запарожскай вобласці збіты ў паветры верталёт Мі-24 Паветраных сіл Украіны. За суткі перахопленыя дзесяць рэактыўных снарадаў сістэмы залпавага агню HIMARS, знішчаныя 22 украінскія беспілотныя лётныя апараты.
Інстытут па вывучэнні вайны: Пуцін імкнецца паправіць рэпутацыю пасля выхаду са збожжавай угоды
24 ліпеня быў апублікаваны артыкул Уладзіміра Пуціна, прысвечаны расійска-афрыканскім адносінам. Як лічаць у Інстытуце па вывучэнні вайны (ISW), яго мэтай, імаверна, было змякчыць шкоду пазіцыям Расіі ў Афрыцы і рэпутацыі Пуціна пасля выхаду са збожжавай угоды і расійскіх удараў па партовай інфраструктуры Украіны. Пуцін у артыкуле пазначыў мэты Расіі па ўсталяванні партнёрскіх адносін з Афрыкай і заклікаў да працягу «традыцыйна цеснага супрацоўніцтва на сусветнай арэне». Ён таксама падкрэсліў важнасць гандлю РФ з афрыканскімі партнёрамі і «бесперапыннага забяспечання харчаваннем» для «падтрымання палітычнай стабільнасці афрыканскіх дзяржаваў», абвінаваціўшы калектыўны Захад у выкарыстанні збожжавай угоды ва ўласных інтарэсах за кошт Расіі і такіх краін, як Эфіопія, Судан і Самалі. Гэтым артыкулам Пуцін таксама, імаверна, спрабуе змякчыць збянтэжанасць ад няздольнасці асабіста прысутнічаць на саміце БРІКС у Паўднёвай Афрыцы з прычыны ордара МКС на арышт, мяркуюць эксперты.
ISW таксама адзначае, што ўдары, якія, як мяркуецца, УСУ нанеслі па расійскіх вайсковых аб’ектах у акупаваным Крыме, часова парушылі лагістыку Расіі праз Крым, хоць Мінабароны РФ і паведаміла пра знішчэнне ўсіх беспілотнікаў. Кіраўнік акупацыйнай улады паўвострава Аксёнаў часова прыпыніў аўтамабільны рух па трасе Джанкой — Сімферопаль, а таксама чыгуначную камунікацыю праз Джанкойскі раён. Дарадца па пытаннях акупацыі Крыма Алег Кручкоў заявіў, што акупацыйныя ўлады будуць строга адсочваць паведамленні ў сацыяльных сетках, якія могуць дапамагчы ўкраінскім сілам вызначыць цэлі ў Крыме.
24 ліпеня ўкраінскія войскі працягвалі контрнаступальныя аперацыі як мінімум на трох участках фронту і, як паведамляецца, прасунуліся на асобных участках.
Намесніца міністра абароны Украіны Ганна Маляр паведаміла, што за мінулы тыдзень украінскія сілы паступова прасоўваліся на паўднёвым флангу Бахмута, а таксама на Бярдзянскім і Мелітопальскім напрамках.
Маляр таксама адзначыла, што гэтыя контрнаступальныя дзеянні праходзяць на фоне расійскіх наступальных аперацый на Купянскім, Ліманскім, Аўдзееўскім і Мар'інскім напрамках.
Расійскія крыніцы сцвярджалі, што ўкраінскія сілы правялі абмежаваныя наземныя атакі ў заходняй частцы Данецкай вобласці на поўдзень ад Вялікай Навасёлкі і прасунуліся на поўдзень ад Арэхава ў заходняй частцы Запарожскай вобласці.
На што яшчэ звярнулі ўвагу эксперты:
- расійскія войскі вялі наступальныя дзеянні на рубяжы Купянск — Сватава — Крамянная, у раёне Бахмута, на рубяжы Аўдзееўка — Данецк, займаючы нязначныя пазіцыі на поўдзень ад Крамянной;
- украінскія войскі вялі наступальныя дзеянні на рубяжы Купянск — Сватава — Крамянная і ў раёне Бахмута і, як паведамляецца, прасунуліся ў раёне Бахмута;
- расійскія войскі вялі наступальныя аперацыі на захадзе Данецкай вобласці і не дамагліся ні пацверджаных, ні заяўленых поспехаў;
- украінскія афіцыйныя асобы працягваюць раскрываць дачыненне беларускіх структур да гвалтоўнай дэпартацыі ўкраінскіх дзяцей.