Самым узроставым рэзервістам у Ізраілі стаў 95-гадовы пісьменнік Эзра Яхін, піша ізраільскае выданне kipa.co.il.
Ён добраахвотна прыйшоў у мабілізацыйны пункт і запатрабаваў, каб яго залічылі ў рэзервісты. Яго настойлівую просьбу пра прызыў задаволілі, але вырашылі, што ён можа лепш за ўсё паслужыць у працы з моладдзю.
Эзра Яхін ваяваў яшчэ ў габрэйскай арганізацыі «Лехі» ў часы брытанскага мандату ў Палестыне. Падчас вайны за незалежнасць Ізраіля 1947−1949 гадоў ён страціў правае вока. Паводле Яхіна, з таго часу ён нічога не баіцца.
Пажылы рэзервіст ізраільскай арміі ў каментары BILD расказаў, чаму ён гэта зрабіў.
«Два дні таму я атрымаў загад пра прызыў з рэзерву і адразу ж надзеў форму, — кажа ветэран. — Толькі смерць можа вызваліць мяне ад гэтага. Я хачу быць з байцамі і перадаць ім баявы дух падполля, усяліць у іх габрэйскі дух і падрыхтаваць іх да вайны. Я тлумачу ім, што мы не ў Еўропе часоў нацызму і нікому не дазволім зрабіць з намі тое, што зрабілі нацысты».
«Гэта зямля габрэйскага народа, і я буду абараняць яе да апошняга ўздыху, — дадаў Яхін. — Я ўдзельнічаў у многіх войнах і сотні разоў унікаў смерці. І я ніколі не баяўся. Любы, хто паспрабуе нас знішчыць, знікне — і гэтым разам мы пераможам. Габрэйскі народ жывы!»
Паводле звестак ізраільскіх СМІ, пасля пачатку палестынска-ізраільскага канфлікту запісацца ў армію выказалі жаданне тысячы ультрарэлігійных габрэяў, якія традыцыйна ўнікаюць службы ў войску.